Астана қаласында жұмысшы мамандықтарының беделін арттыруға бағытталған «Еңбек жолы» республикалық байқауының қорытындысы жарияланып, жеңімпаздарды салтанатты марапаттау рәсімі өтті. Аталған шараға Қостанай облысының делегациясы да қатысты.
Қазақстан Республикасының Мемлекеттік кеңесшісі Ерлан Карин іс-шарада сөйлеген сөзінде заңдарды қабылдауға болады, зауыттар да салынады, бірақ жұмысты тек өз мамандығына берілген, қабілетті және ниетті адамдар атқарған кезде ғана нақты прогресс болатынын атап өтті.
Осындай адал мамандардың жарқын мысалы – «ҚЖЭК» МКК электромонтері Фасхутдинов Ришат Изахович. Өз кәсібі бойынша қаншама ұрпақ тәрбиелеп, 44 жылдан астам уақытын электр энергетикасына арнаған ол үнемі өз шеберлігін жетілдіруге, рационализаторлық ұсыныстар енгізуге тырысады.
«Жұмыс істейтін жастардың үздік тәлімгері» номинациясы бойынша облыстық кезеңнің жеңімпазы ретінде Республикалық комиссияның қарауына ұсынылды. Бүгін салтанатты марапаттау рәсімінде Ришат Изаховичқа III дәрежелі «Еңбек даңқы» ордені табысталды.
Оның көпжылдық адал еңбегі, жоғары кәсібилігі және жас буын мамандарын даярлауға қосқан үлесі еңбекқор адамның маңыздылығын айқын көрсетеді және таңдаған мамандығына жауапкершіліктің, шеберліктің және адалдықтың үлгісі болып табылады.
